Música e arte para "O Meu Mar"

A Fundación arbíu os actos do 50 aniversario do pasamento do poeta muxián | 7/15/2013

Os poetas no recital poético na inauguración da mostra de Viki Rivadulla

O pasado sábado día 13 iniciáronse en Muxía os actos de conmemoración dos 50 anos da morte de Gonzalo López Abente, que organiza a Fundación que leva o nome do poeta.

Foi un inicio onde tivo un especial protagonismo o poema de López Abente “O meu mar”, xa que o primeiro acto foi a inauguración do exposición de pintura e escultura de Viki Rivadulla, que precisamente leva por título xenérico “O meu mar”, e que quedou aberta ao público na sala de exposicións do Edificio de Servizos Múltiples.

A exposición abriuna o presidente de Fundación e Alcalde de Muxía Félix Porto, que destacou a importancia para Muxía do traballo e a obra plástica que realiza Viki Rivadulla. A continuación falou Xosé Antón Castro, critico de arte e docente na Facultade de Belas Artes da Universidade de Vigo, que falou de Viki Rivadulla como herdeira de importantes valores internacionais da pintura galega como Maruxa Mallo ou Luís Seoane, e destacou a transcendencia da obra de Viki polo seu valor de referencia da cultura mariñeira e destacando dentro desta o papel da muller do mar, como muller traballadora. Antón Castro sinalou que a obra de Viki é moi representativa da cultura propia non só de Muxía senón de toda a Costa da Morte, e que esta ten na obra de Viki un dos valores iconográficos máis destacados.

Viki Rivadulla presentando a súa mostra O Meu MarDespois interveu a propia Viki Rivadulla e a continuación leron poemas, todos eles con referencia ao mar, un grupo de poetas da Costa da Morte: Miro Villar, Rosalía Fernández Rial, X. H. Rivadulla Corcón e Miguel Mato Fondo, que como remate da inauguración recitaron conxuntamente o poeta que da nome á exposición.

Despois de quedar aberta a exposición tivo lugar, no Salón do Voluntariado, unha importante estrea musical, tamén baseada no poema “O meu mar”, xa que o compositor Miguel Brotóns compuxo unha fermosa peza musical baseada neste poema, que foi interpretada pola soprano Teresa Novoa e o pianista Alejo Amoedo Portela. Ademais desta peza Teresa Novoa interpretou outras pezas, todas elas de compositores e poetas galegos, músicos como José Castro “Chané”, Xoán Montes e poetas como Rosalía de Castro, Manuel Curros Enríquez e incluso do autor Daniel Rodríguez Castelao.

Foi un inicio da celebración dos 50 anos da morte de López Abente cun claro acento lírico, como corresponde para homenaxear a un autor que se ben ten unha importante obra narrativa é fundamentalmente poeta, sendo neste xénero no que especialmente captou o ser máis fondo das xentes mariñeiras da vila de Muxía, onde naceu e morreu no ano de 1963, o 23 de xullo.


Entrada antiga Novas de Interese Nova entrada